६१ किलो सुन तस्करी प्रकरणमा मष्टा ग्रुप संचालक जीवन चलाउनेविरुद्ध सम्पत्ति शुद्धीकरण मुद्दा दायर

काठमाडौं । ६१ किलो सुन तस्करी प्रकरणमा संलग्न मष्टा ग्रुप प्रा.लि.का सञ्चालक जीवन चलाउनेविरुद्ध काठमाडौँ जिल्ला अदालतमा सम्पत्ति शुद्धीकरणको मुद्दा दायर गरिएको छ। उक्त मुद्दा सम्पत्ति शुद्धीकरण विभागले दायर गरेको हो।

अनुसन्धानका क्रममा देखिएको छ कि जीवनले अवैध सुन तस्करीबाट प्राप्त रकम प्रयोग गरी झापा, काठमाडौँ, रौतहट र काभ्रेपलाञ्चोकमा कुल ३२ कित्ता जग्गा खरिद गरेका छन्।

अभियोगपत्रअनुसार, उनले अवैध स्रोतबाट कुल २ अर्ब ७ करोड रुपैयाँभन्दा बढी रकम शुद्धीकरण गरेको पुष्टि भएको छ। उनको सम्बन्ध बेल्जियम नागरिक दावा छिरिङसँग पनि रहेको देखिएको छ।

सम्पत्ति शुद्धीकरण विभागले दायर गरेको अभियोगपत्रमा भनिएको छ:

“खरीदको कुल मूल्य, अवैध तरिकाले आयात गरेको ६० केजी ७१६ ग्राम सुनको मूल्य र हिमालयन बैंकमा रहेको खाताबाट प्राप्त रकम मिलाएर प्रतिवादीले कुल २,०७,६२,१३,५१६ रुपैयाँ शुद्धीकरण गरेको पुष्टि भएको छ।”

अनुसन्धान र बरामद

• साउन ३ गते राजस्व अनुसन्धान विभागले मोटरसाइकलको ब्रेक प्याडभित्र लुकाइएको सुन बरामद गरेको थियो।

• पछि अनुसन्धान केन्द्रीय अनुसन्धान ब्युरो (सीआईबी) लाई जिम्मा दिइएको र अनुसन्धानबाट कुल ३०२ किलो सुन तस्करी भएको निष्कर्ष निकालिएको थियो।

यस प्रकरणमा दावा छिरिङ, जीवन चलाउनेसहित २९ जना विरुद्ध सुन भन्सार चोरी, पैठारी र संगठित अपराधसम्बन्धी मुद्दा दायर गरिएको छ।
अनुसन्धान समितिले संबन्धित प्रहरी अधिकारीहरूको कारबाही, साथै केही राजनीतिक तथा विदेशी सम्बन्धित व्यक्तिहरू विरुद्ध पनि मुद्दा सिफारिस गरेको छ।