काठमाडौं — दोस्रो कारोबार दिन सोमबार सेयर बजारमा हल्का गिरावट देखिएको छ। आइतबार ३०.७५ अंकले बढेर २६३१.१४ बिन्दुमा पुगेको नेप्से सोमबार ८.२४ अंकले घट्दै २६२२.९० बिन्दुमा पुगेको हो। गत साता करिब ९६ अंकले उक्लिएको बजार यो साताको पहिलो दिन उत्साहजनक रहँदा दोस्रो दिन भने स्वाभाविक सुधारको चरणमा प्रवेश गरेको देखिएको छ।
सोमबार बजारमा ७२ कम्पनीको सेयर मूल्य बढेको र अन्य ३३३ स्टकमा करिब ५५ हजार पटकको कारोबार हुँदै १ करोड २१ लाख ८५ हजार कित्ता सेयर किनबेच भएको छ। समग्र कारोबार रकम करिब ६ अर्ब ५ करोड रुपैयाँ पुगेको छ, जुन आइतबारको ९ अर्ब २० करोड रुपैयाँको तुलनामा कम हो।
सेन्सेटिभ इन्डेक्स ०.८३ अंक, फ्लोट इन्डेक्स ०.५६ अंक र सेन्सेटिभ फ्लोट इन्डेक्स ०.२२ अंकले घटेका छन्। १३ उपसमूहमध्ये ६ उपसमूहको सूचकांकमा वृद्धि देखिएको छ भने ७ उपसमूहमा गिरावट देखिएको छ। व्यापार उपसमूह ०.९३ प्रतिशतले बढ्दै अग्रपंक्तिमा रहँदा जलविद्युत र जीवन बीमा उपसमूह १.०५ प्रतिशतले घट्दै सबैभन्दा धेरै प्रभावित बने।
मुक्तिनाथ कृषि कम्पनी र एक्सेल डेभलपमेन्ट बैंकका सेयर मूल्य सकारात्मक सर्किट लेभलमा पुगेका छन्। त्यस्तै, नेपाल एसबिआई बैंक ऋणपत्र २०८९ को मूल्य ७.०८ प्रतिशत र एभरेष्ट बैंक लिमिटेड इनर्जी बण्ड २०८९ को मूल्य ५ प्रतिशतभन्दा बढीले बढेको छ। अर्कोतर्फ, इष्टर्न हाइड्रोपावरको सेयरमूल्य १० प्रतिशतले घट्दै दिनकै सबैभन्दा ठूलो गिरावटमा रह्यो। कारोबार रकमको आधारमा शिवम् सिमेन्ट्स ३७ करोड ६८ लाख रुपैयाँसहित शीर्ष स्थानमा रह्यो भने एनआरएन इन्फ्रास्ट्रक्चर एण्ड डेभलपमेन्ट र राधी विद्युत कम्पनी क्रमशः ३४ करोड र २४ करोडभन्दा बढी कारोबार रकमसहित दोस्रो र तेस्रो स्थानमा रहेका छन्।
विश्लेषकहरूका अनुसार, पछिल्लो दिनको ओरालो बजारमा स्वाभाविक सुधार (healthy correction) को संकेत हो र लगानीकर्ताले दीर्घकालीन दृष्टिकोण राख्दै स्थिरता प्रतीक्षा गर्नु उपयुक्त रहेको बताइएको छ।
