११ मंसिर, बुटवल । सुप्रिम सहकारी संस्थामा भएकाे रकम ठगी र संगठित अपराध अभियोगमा थुनामा रहेका राष्ट्रिय स्वतन्त्र पार्टी (रास्वपा) सभापति रवि लामिछाने र पूर्व गोर्खा मिडिया सञ्चालक छविलाल जोशीको मुद्दाको सुनुवाइ आज पुनः स्थगित भएको छ। उनीहरूको मुद्दा न्यायाधीशद्वय मिलनकुमार राई र सानुमैया डंगोलको इजलासमा परेको थियो। बिगोबमोजिमको रकम बुझाई थुनाबाहिर बसेर मुद्दा लड्न पाउने मागसहित जिल्ला अदालतको आदेशप्रति असन्तुष्टि जनाउँदै लामिछानेले उच्च अदालतमा निवेदन दिएका थिए।
आजको पेसी स्थगित हुनबाट अदालतका सूचना अधिकारी रामबहादुर कुँवरले जानकारी दिँदै भनेका छन् कि रविका कानून व्यवसायीले स्थगन मागेपछि सुनुवाइ रोकिएको हो। यसअघि अघिल्लो बिहीबार पाटन उच्च अदालतमा पनि पेसी परेको कारण बुटवलको इजलासले सुनुवाइ सारिएको थियो।
सो प्रकरणमा यतिबेला मुद्दा अघि बढ्न नसकिरहेको प्रमुख कारण सर्वोच्च अदालतमा रहेको मूल अभियोगसहितको मिसिल झिकाइको प्रक्रिया हो। कात्तिक २७ गते न्यायाधीश वासुदेव आचार्य र ओमप्रसाद अर्यालको संयुक्त इजलासले मूल मिसिल मागाउने आदेश दिएको थियो। त्यही आदेशअनुसार अघिल्लो बिहीबारका लागि पेसी तोकिए पनि मिसिल नआएपछि फेरि स्थगित गरिएको हो। कात्तिक २० गतेको सुनुवाइमा पनि सुरु मिसिल मागिने आदेश जारी भएको थियो। सर्वोच्चबाट सुरु मिसिल नआए पनि जिल्ला अदालतको प्रतिलिपि भने प्राप्त भइसकेको छ।
यसबीच न्यायाधीश मिलनकुमार राई र ओमप्रसाद अर्यालको इजलासले दुवै प्रतिवादीको मुद्दा एउटै प्रकृतिको भएकाले एकैसाथ राख्न आदेश गरिसकेको छ। लामिछानेले बिगो बुझाई थुनाबाहिर रहेर मुद्दा लड्न पाउने व्यवस्था मिलाउन निवेदन दिएपछि उच्च अदालतले जोशीको फाइल समेत पेश गर्न आदेश दिएको थियो। यसअघि उच्च अदालत बुटवलले लामिछानेको मुद्दामा कैफियत प्रतिवेदन मागेको थियो।
पुर्पक्षका लागि थुनामा रहेका लामिछानेले सहकारीमा भएको अपचलनबापत आफूले तिर्नुपर्ने रकम बराबरको बिगो दाखिला गरिसक्दा पनि जिल्ला अदालत रुपन्देहीले रिहा नगरेपछि भदौ ९ गते उच्च अदालतमा निवेदन दर्ता गरेका थिए। तर, जिल्ला अदालतका न्यायाधीश नारायण सापकोटाको इजलासले साउन २६ गते नै उनको निवेदन अस्वीकार गरिसकेको थियो।
सुप्रिम सहकारी ठगी प्रकरणमा रविसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरी अभियोग पत्र दायर गरिएको छ। लामिछानेले उक्त रकमको चार भागमध्ये आफ्नो हिस्साको २ करोड ७४ लाख ८४ हजार रुपैयाँ बैंक जमानतका रूपमा पेस गरिसकेका छन्। जोशीले पनि त्यति नै रकमबापत जमानत पेस गरेका छन्। तर दुवै जनाको व्यक्तिगत बिगो यकिन नभएको भन्दै रिहा गर्ने आदेश रोकिएको हो।
हाल लामिछाने ललितपुरको नख्खु कारागारमा छन् भने जोशी भैरहवा कारागारमा छन्। लामिछानेले आफू सहकारीको शेयर सदस्य, बचतकर्ता वा ऋणी नरहेको दाबी गर्दै सहकारीबाट रकम नलिएको इन्कारी बयान दिँदै आएका छन्।
