वीरगञ्ज भन्सार कार्यालयले चालु आर्थिक वर्ष २०८२/८३ को पहिलो चार महिनामा ७५ अर्ब ५८ करोड रुपैयाँ राजस्व सङ्कलन गरेको छ। भन्सार विभागले उक्त अवधि लिएर ८९ अर्ब २४ करोड राजस्व सङ्कलन गर्ने लक्ष्य तय गरे पनि सोको ८५ प्रतिशत मात्र वसुली हुन सकेको छ। साउन, भदौ र असोज महिनामा राजस्व सङ्कलन उत्साहजनक देखिए पनि कात्तिक महिनामा भने अपेक्षित प्रगति देखिएन। भन्सार प्रशासक विष्णुप्रसाद ज्ञवालीका अनुसार कात्तिक महिनामा जेनजी आन्दोलन, छठपर्व र बाढीजस्ता कारणले राजस्व सङ्कलन प्रभावित भएको हो। उनका शब्दमा, “चालु आवको तीन महिनामा राजस्व सङ्कलन लक्ष्य उन्मुख भइरहेको थियो,” तर कात्तिकमा लक्ष्य राखिएको २३ अर्ब ६३ करोडमध्ये १७ अर्ब ३३ करोड मात्र सङ्कलन भएको छ। भन्सार कार्यालयका विवरणअनुसार साउनमा १८ अर्ब ४४ करोड, भदौमा २० अर्ब ७३ करोड, असोजमा १९ अर्ब नौ करोड तथा कात्तिकमा १७ अर्ब ३३ करोड राजस्व सङ्कलन भएको छ, जसले कात्तिकको गिरावटलाई स्पष्ट देखाएको छ।
