काठमाडौँ । शिक्षा, विज्ञान तथा प्रविधि मन्त्री तथा सरकारका प्रवक्ता सस्मित पोखरेलले अर्थमन्त्री स्वर्णिम वाग्लेमाथि छानबिन गर्न कुनै संसदीय समिति नबन्ने स्पष्ट पारेका छन्।
बजेटमा करको दर हेरफेर गरिएको भन्दै विपक्षी दलहरूले संसदीय छानबिन समितिको माग गरिरहेका बेला मन्त्री पोखरेलले सरकारले त्यस्तो आवश्यकता महसुस नगरेको बताएका हुन्।
उनले अर्थमन्त्री वाग्लेले उठाइएका विषयमा सदन र सम्बन्धित समितिमा स्पष्ट जवाफ दिइसकेको उल्लेख गर्दै थप छानबिन आवश्यक नदेखिएको बताए।
‘अर्थमन्त्रीले यस विषयमा प्रस्ट पारिसक्नुभएको छ। उठेका विषयहरूको उत्तर सदनमा पनि दिइसक्नुभएको छ, समितिमा पनि दिइसक्नुभएको छ। योभन्दा बाहिर आवश्यक त्यस्तो केही पनि अहिले हामीले महसुस गरेका छैनौँ,’ मन्त्री पोखरेलले आज बसेको मन्त्रीपरिषद् बैठकका निर्णय सार्वजनिक गरिसकेपछि भने।
२९ जेठ २०८३, शुक्रबार ०४:३३ मा प्रकाशित
