काठमाडौँ । जेन–जी आन्दोलनको प्रभावपछि पहिलोपटक महिला प्रधानमन्त्रीको रूपमा सुशीला कार्कीको नेतृत्वमा बनेको नयाँ सरकारले मन्त्री छनोटमा नयाँ अभ्यास थालेको छ। राजनीतिक दल बाहिरबाट योग्य र विज्ञ व्यक्तित्वहरूलाई मन्त्री बनाउने तयारीसँगै संस्कृति, पर्यटन तथा नागरिक उड्डयन मन्त्रालयका लागि चार व्यक्तिको नाम सार्वजनिक चासोको केन्द्र बनेका छन्।
नेपाललाई विश्वसामु चिनाउने महत्त्वपूर्ण मानिने यस मन्त्रालयको सम्भावित नेतृत्वबारे चर्चा तीव्र हुँदै गएको छ।
फुर गेल्जे शेर्पा
सोलुखुम्बुको साधारण परिवारमा जन्मिएका फुर गेल्जे बाल्यकालदेखि हिमालसँग नजिकिए। अन्तर्राष्ट्रिय पर्वतारोहणमा सफलताका शिखर छुनुका साथै उनले पर्यटनलाई नयाँ आयाम दिएका छन्।
नेपाल माउण्टेनियरिङ एसोसिएसनका अध्यक्षदेखि पर्यटन बोर्ड र नेपाल एयरलाइन्स बोर्डसम्मको अनुभव, होटल र हेलिकप्टर व्यवसायदेखि सामाजिक उत्तरदायित्वसम्मको उनको यात्रा यस मन्त्रालयको उद्देश्यसँग मेल खाने देखिन्छ।
क्याप्टेन विजय लामा
तीन दशकदेखि आकाशमा नेपाललाई बोकेर उडिरहेका वरिष्ठ पाइलट विजय लामा सुरक्षित र पारदर्शी नागरिक उड्डयनका प्रबल समर्थक मानिन्छन्।
कलाकार, संगीतकार र सांस्कृतिक अभियन्ताका रूपमा समेत सक्रिय उनले विमानको ककपिटदेखि पर्दासम्म ‘पहिले देश’ भन्ने भावनालाई जीवित राखेका छन्। नागरिक उड्डयनको सुधार र सांस्कृतिक सम्पदाको प्रवर्द्धनमा उनका विचारले उनलाई उपयुक्त उम्मेदवारका रूपमा प्रस्तुत गरेको छ।
पुनम यादव
संस्कृति, आस्था र समाजसेवामा लामो समयदेखि सक्रिय पुनम यादवले धार्मिक तथा सांस्कृतिक संवादमार्फत जनस्तरसम्मको पहुँच बनाएकी छन्।
सम्पदा संरक्षणदेखि पर्यटन प्रवर्द्धनसम्म उनको नेतृत्वले पर्यटनलाई केवल व्यापारिक होइन, आत्मीय अनुभवको रूपमा विकास गर्ने दृष्टि देखाएको छ। दुर्गम क्षेत्रमा सुरक्षित हवाई सेवा विस्तार गर्ने उनको योजना पनि चर्चामा छ।
विनायक शाह
होटल संघ नेपाल (हान)का अध्यक्ष विनायक शाहसँग तीन दशकभन्दा बढीको पर्यटन अनुभव छ।
कोभिड–१९ संकटमा उद्योगलाई जोगाउन निर्णायक भूमिका खेलेका उनले हजारौं रोजगारी बचाए र पुनःस्थापनाका पहल अघि बढाए। उनको नेतृत्वमा हानले संस्कृति र परम्परा प्रवर्द्धनमा महत्त्वपूर्ण कदम चाल्यो। शाह समावेशी, दिगो र व्यावहारिक पर्यटन नीतिका पक्षधर मानिन्छन्।
प्रधानमन्त्री कार्कीको क्याबिनेटमा कसको प्रवेश हुने भन्ने निर्णय नभइसकेकाले खोजी जारी छ। तर यी चार व्यक्तित्वले बोकेको अनुभव, संघर्ष र दृष्टिले नेपाली जनतामा सकारात्मक अपेक्षा जगाएको छ।
