काठमाडौं । लामो समयदेखि ऊर्जा क्षेत्रमा सक्रिय रहेका कुलमान घिसिङलाई सरकारले ऊर्जा, जलस्रोत तथा सिँचाइ मन्त्रालयको जिम्मेवारी दिएको छ। घिसिङ मन्त्री नियुक्त भएपछि मुलुकका निजी क्षेत्रका ऊर्जा उत्पादकहरू उत्साहित बनेका छन्।
नेपाल विद्युत प्राधिकरणलाई पुनर्जीवित गर्दै विद्युत आपूर्ति सुधारमा उल्लेखनीय योगदान पुर्याएका घिसिङको पुनः सरकारी नेतृत्वमा आगमनसँगै ऊर्जा क्षेत्रको विकास र विस्तारमा गति आउने विश्वास गरिएको छ।
स्वतन्त्र ऊर्जा उत्पादकहरूको संस्थान (IPPAN) का पदाधिकारीहरूले घिसिङको अनुभव, कार्यक्षमता र समर्पणले ऊर्जा क्षेत्रमा नयाँ आशा जगाएको बताएका छन्। उनीहरू भन्छन्, “उनको प्राविधिक दक्षता, दृढ नेतृत्व र व्यावहारिक सोचले निजी क्षेत्रलाई अझै प्रोत्साहित गर्नेछ।”
विशेषगरी जलविद्युत उत्पादनमा निजी क्षेत्रको भूमिका महत्वपूर्ण मानिँदै आएको छ। सरकार र निजी क्षेत्रबीचको साझेदारीलाई अझ मजबुत बनाउन घिसिङको भूमिका निर्णायक हुने अपेक्षा गरिएको छ। प्राधिकरणमा रहेर गरेका सुधारात्मक कदमहरूले उनले मन्त्रीको भूमिकामा पनि ऊर्जा क्षेत्रमा दीर्घकालीन परिवर्तन ल्याउने विश्वास व्यक्त गरिएको छ।
निजी लगानीकर्ताहरूले घिसिङलाई “ऊर्जा क्षेत्रमा आशाको दियो” भन्दै स्वागत गरेका छन्। ईप्पान नेपालका अध्यक्ष गणेश कार्कीले भने, “अब विद्युत उत्पादन, वितरण र निर्यातमा ठूलो प्रगति हुने छ।”
अध्यक्ष कार्कीले यससँगै नेपाललाई जलविद्युत शक्तिशाली राष्ट्र बनाउने लक्ष्यतर्फ ऊर्जा उत्पादक र सरकारले सहकार्य गर्ने वातावरण निर्माण भएको जनाए।
