काठमाडौं । शिक्षा, विज्ञान तथा प्रविधि मन्त्री महावीर पुनले त्रिभुवन विश्वविद्यालय, कीर्तिपुरको जंगल क्षेत्रमा सुन्दर पार्क निर्माण गर्ने उद्देश्यसहित सुरु गरिएको श्रमदान अभियानलाई अझ सशक्त बनाउन स्थानीय बासिन्दा र विश्वविद्यालयका विद्यार्थीहरूलाई सहभागी हुन आग्रह गरेका छन् ।
मन्त्री पुनका अनुसार कीर्तिपुरस्थित त्रिभुवन विश्वविद्यालय परिसरभित्र करिब ३५० रोपनी क्षेत्रमा फैलिएको जंगलमा रहेका बाक्ला झाडीहरूलाई स्वयंसेवकहरूले पछिल्ला २५ दिनयता निरन्तर श्रमदान गर्दै प्रायः फडानी गरिसकेका छन् । उनका भनाइमा, यो अभियानमा सहभागी हुनेमध्ये अधिकांश बाहिरी जिल्लाबाट आएका विद्यार्थी स्वयंसेवकहरू हुन्, जसले विश्वविद्यालय क्षेत्रलाई सफा र आकर्षक बनाउन हृदयदेखि योगदान दिएका छन् ।
पुनले सामाजिक सञ्जाल फेसबुकमार्फत लेखेका छन्, “अब कीर्तिपुर विश्वविद्यालयको जंगल सफा हुँदै सुन्दर पार्क बन्ने तयारीमा छ । यो कार्य केही उत्साही स्वयंसेवकहरूले २५ दिनदेखि श्रमदान गरेर सम्भव बनाएका हुन् । अब स्थानीय बासिन्दा, विद्यार्थी र इच्छुक व्यक्ति सबैलाई यस अभियानमा सहभागी हुन अनुरोध गर्दछु ।”
श्रमदान अभियानले विश्वविद्यालय परिसरमा लामो समयदेखि फोहर र झाडीले ढाकिएका क्षेत्रहरूलाई सफा मात्र गरेको छैन, भविष्यमा हरियाली, विश्राम र अध्ययनका लागि उपयुक्त खुला पार्कमा रूपान्तरण गर्ने लक्ष्य पनि लिएको छ । मन्त्री पुनका अनुसार, बन्ने पार्कमा हिँडडुल मार्ग, वृक्षारोपण, विश्रामस्थल र विद्यार्थी तथा सर्वसाधारणका लागि अध्ययन र मनोरञ्जन अनुकूल वातावरण तयार पारिनेछ ।
नेपालको सबैभन्दा पुरानो र ठूलो शिक्षण संस्था त्रिभुवन विश्वविद्यालयको यस पहलले शिक्षा र वातावरण संरक्षणबीचको सहकार्यको नयाँ दृष्टान्त पेश गरेको मन्त्री पुनको भनाइ छ । उनको नेतृत्वमा सुरु भएको यो अभियानले विश्वविद्यालयलाई केवल शैक्षिक केन्द्र मात्र नभई समुदायमैत्री, हरित र सौन्दर्यपूर्ण क्षेत्रको रुपमा रूपान्तरण गर्ने अपेक्षा गरिएको छ ।
