काठमाडौँ । बाढीका कारण क्षतिग्रस्त माथिल्लो त्रिशूली–१ जलविद्युत् आयोजनामा सुरुङभित्र हराइरहेकाहरूको खोजी तथा उद्धार कार्य शुक्रबार पनि जारी रह्यो ।
स्वतन्त्र ऊर्जा उत्पादकहरूको संस्था नेपाल (इप्पान) का अनुसार खोजीका क्रममा ६ जनाको शव फेला परेको छ । सल्लेटार क्षेत्रमा भेटिएका शवलाई नेपाली सेनाले बट्टार ल्याएको हो । शवको अवस्था क्षतविक्षत रहेकाले पहिचान हुन सकेको छैन ।
शुक्रबार दिनभर हेडवर्क्स तथा सुरुङ क्षेत्रमा खोजी गरिएको थियो । उद्धारका लागि कोरियाली, शेर्पा, सर्च तथा ड्रोन टोली परिचालन गरिएको छ । त्यस्तै, विशेष क्यामेरा र तालिमप्राप्त कुकुरसमेत खोजीमा प्रयोग गरिएको छ ।
कम्पनीका अनुसार उद्धार कार्यका लागि १५ वटा विभिन्न मेसिन तथा उपकरण आयोजनास्थलमा पुर्याइएको छ । शनिबारदेखि खोजी तथा उद्धार कार्यलाई थप तीव्रता दिइने जनाइएको छ ।
सुरुङभित्र जमेको पानी निकाल्न शुक्रबार पनि वाटर पम्प सञ्चालनमा राखिएको थियो । बाढी आउनुअघि आयोजनास्थलमा एक हजार ४३३ जना कार्यरत रहेकामा हालसम्म ८७६ जनाको उद्धार भइसकेको छ ।
यसैबीच, प्रवर्द्धक कम्पनी तथा निर्माण कम्पनी डोसान र पावर चाइनाको व्यवस्थापन टोलीले शुक्रबार गृह सचिव केदारनाथ शर्मासँग भेट गरी उद्धारको पछिल्लो अवस्थाबारे जानकारी गराएको छ ।
टोलीले उद्धारका लागि आवश्यक थप मेसिन तथा उपकरण आयोजनास्थलसम्म पुर्याउन सहजीकरण गरिदिन आग्रह गरेको थियो । गृह सचिव शर्माले आवश्यक उपकरण तत्काल पठाउन सहजीकरण गर्ने प्रतिबद्धता जनाएका छन् ।
