काठमाडौं । प्रतिनिधिसभा निर्वाचनका लागि उम्मेदवारी दिने तयारीमा रहेका राष्ट्रियसभा सदस्यहरू नारायणकाजी श्रेष्ठ, वामदेव गौतम र भगवती न्यौपानेले आ–आफ्नो पदबाट राजीनामा दिएका छन् । उनीहरूले राष्ट्रियसभाका अध्यक्ष नारायणप्रसाद दाहालसमक्ष लिखित रूपमा राजीनामा बुझाउँदै औपचारिक रूपमा जिम्मेवारी त्याग गरेका हुन् । नेकपाका वरिष्ठ नेता नारायणकाजी श्रेष्ठ सर्लाही क्षेत्र नम्बर ३ बाट प्रतिनिधिसभा सदस्यमा उम्मेदवारी दिन तयारीमा रहेका छन् भने वामदेव गौतम बर्दिया क्षेत्र नम्बर १ बाट चुनावी प्रतिस्पर्धामा उत्रने भएका छन् । त्यस्तै, नेकपा एमालेकी नेतृ भगवती न्यौपाने तनहुँ क्षेत्र नम्बर १ बाट उम्मेदवारी दिने तयारीमा रहेकी छन् । राष्ट्रियसभा सदस्य पदबाट राजीनामा दिएर उनीहरू तीनै जना प्रत्यक्ष निर्वाचनको मैदानमा होमिन लाग्दा आगामी चुनावी प्रतिस्पर्धा अझ चासोको विषय बन्ने देखिएको छ ।
